Бишкекте Кыргыз Республикасынын фармацевтика өнөр ,2026-жылдын 10–12-март күндөрү Кыргыз Республикасынын аймагында Бириккен Улуттар Уюмунун Өнөр жайды өнүктүрүү боюнча уюму (ЮНИДО) тарабынан эл аралык ,Бишкекте Кыргыз Республикасынын фармацевтика өнөр жайын өнүктүрүү боюнча ЮНИДОнун эксперттик миссиясы өтүүдө,

2026-жылдын 10–12-март күндөрү Кыргыз Республикасынын аймагында Бириккен Улуттар Уюмунун Өнөр жайды өнүктүрүү боюнча уюму (ЮНИДО) тарабынан эл аралык эксперттердин миссиясы өткөрүлүүдө. Миссия өлкөнүн фармацевтика тармагын модернизациялоого жана дары каражаттарын өндүрүүдөгү тийиштүү өндүрүш практикасынын (GMP) эл аралык стандарттарын киргизүүгө колдоо көрсөтүүгө багытталган.

Бул сапар Кыргыз Республикасынын Министрлер Кабинети менен ЮНИДОнун ортосундагы стратегиялык кызматташтыкты өнүктүрүүнүн алкагында, тактап айтканда, 2025–2029-жылдарга Кыргыз Республикасы үчүн өлкөлүк өнөктөштүк программасынын (ПСП) негизинде уюштурулууда. Аталган программада фармацевтика өнөр жайы артыкчылыктуу багыттардын бири катары белгиленген.

2026-жылдын 10-мартында Бишкек шаарында ЮНИДОнун эксперттери Кыргыз Республикасынын Экономика жана коммерция министрлигинин, Кыргыз Республикасынын Саламаттык сактоо министрлигинин жана ата мекендик фармацевтикалык компаниялардын өкүлдөрү менен жолугушуу өткөрүштү. Жолугушуунун жүрүшүндө фармацевтика тармагын өнүктүрүүнүн артыкчылыктары, GMP стандарттары боюнча Евразия экономикалык бирлигинин талаптары, ошондой эле фармацевтикалык өндүрүштү модернизациялоону колдоо механизмдери талкууланды.

Ошол эле күнү мамлекеттик органдардын, фармацевтикалык продукция өндүрүүчүлөрдүн жана эл аралык эксперттердин катышуусунда «Кыргыз Республикасынын фармацевтика өнөр жайынын тийиштүү өндүрүш практикасынын (GMP) талаптарына шайкештигин бекемдөө: баалоонун жыйынтыктары, эл аралык стандарттар жана мындан аркы кадамдар» аттуу жумушчу семинар өткөрүлдү.

Иш-чаранын жүрүшүндө ЮНИДОнун эксперттери ата мекендик фармацевтикалык ишканалардын GMP талаптарына шайкештик деңгээли боюнча жүргүзүлгөн баалоонун жыйынтыктарын, ошондой эле эл аралык стандарттар жана жөнгө салуу практикалары боюнча жалпы маалыматтарды сунушташты. Өзгөчө көңүл GMP стандарттарын киргизүүнүн дары каражаттарынын сапатын жана коопсуздугун жогорулатууда, ошондой эле кыргызстандык өндүрүүчүлөрдүн экспорттук мүмкүнчүлүктөрүн кеңейтүүдөгү маанисине бурулду. Бул, өзгөчө, Евразия экономикалык бирлигине мүчө өлкөлөрдүн рынокторуна чыгуу үчүн маанилүү экени белгиленди.

Мындан тышкары, катышуучуларга ЮНИДО тарабынан фармацевтикалык өндүрүүчүлөр арасында жүргүзүлгөн сурамжылоонун жыйынтыктары сунушталды. Бул сурамжылоо тармактын GMP стандарттарын киргизүүгө даярдык деңгээлин аныктоого жана өндүрүш процесстерин мындан ары өнүктүрүү жана модернизациялоо үчүн негизги багыттарды белгилөөгө мүмкүндүк берди.

Миссиянын алкагында ЮНИДОнун эксперттери өлкөдөгү фармацевтикалык ишканаларга техникалык сапарларды жүргүзүп, GMP стандарттарынын учурдагы колдонулуш деңгээлин баалашат жана техникалык жана эксперттик колдоого болгон муктаждыктарды аныкташат.

Миссиянын жыйынтыктоочу жолугушуусу 2026-жылдын 12-мартында өтөт. Анын жыйынтыгында кызматташтыкты мындан ары өнүктүрүү жана Кыргызстандын фармацевтика тармагынын өндүрүштүк потенциалын чыңдоого багытталган техникалык колдоо демилгесин даярдоо боюнча кийинки кадамдар аныкталат.

Бул демилгени ишке ашыруу дары каражаттарынын сапатын жана коопсуздугун жогорулатууга, улуттук фармацевтика өнөр жайын өнүктүрүүгө жана ата мекендик өндүрүүчүлөрдүн экспорттук мүмкүнчүлүктөрүн кеңейтүүгө өбөлгө түзөрү күтүлүүдө.

EGOV.KG

EGOV.KG