КР ТИМинин 2026-жылдын 5-ноябрына карата маалыматтык билдирүүсү,Кыргыз Республикасынын жараны Э.Т. алдамчылык аракеттеринин натыйжасында Россия Федерациясынын аймагындагы аскер бөлүктөрүнүн биринде жүргөндүгү туура,КР ТИМинин 2026-жылдын 5-ноябрына карата маалыматтык билдирүүсү,

Кыргыз Республикасынын жараны Э.Т. алдамчылык аракеттеринин натыйжасында Россия Федерациясынын аймагындагы аскер бөлүктөрүнүн биринде жүргөндүгү тууралуу жалпыга маалымдоо каражаттарында жарыяланган репортажга байланыштуу, Кыргыз Республикасынын Россия Федерациясындагы Элчилиги аталган жарандын мекенине тез арада кайтарылышын камсыз кылуу маселеси боюнча Россия Федерациясынын Тышкы иштер министрлигине тиешелүү Нота жөнөттү.

Мындан тышкары, Кыргыз Республикасынын Элчилиги бул факты боюнча ар тараптуу текшерүү жүргүзүү, күнөөлүү адамдарды аныктоо жана мыйзамга ылайык жоопкерчиликке тартууну камсыз кылуу тууралуу Россия Федерациясынын компетенттүү органдарына расмий каттарды жөнөттү.

Кыргыз Республикасынын Москва шаарындагы Элчилиги Э.Т. аттуу жарандын жакын туугандары менен туруктуу байланышта болуп, аталган маселени өзгөчө көзөмөлүнө алган жана зарыл болгон жардам көрсөтүү боюнча иштерди мындан ары да улантат.

Ошол эле учурда Министрлик жарандарды ар кандай терс кесепеттерге жол бербөө максатында келишимдерге жана башка документтерге кол коюудан мурда алардын мазмунун кылдаттык менен окуп чыгып, кабыл алып жаткан милдеттенмелерине өзгөчө көңүл бурууга чакырат.

Министрлик мындан ары да чет өлкөлөрдө жүргөн Кыргыз Республикасынын жарандарынын укуктарын жана мыйзамдуу кызыкчылыктарын коргоо боюнча зарыл көмөк көрсөтүүнү улантат.