Медициналык жогорку окуу жайларын мамлекеттик аккредитациялоонун жыйынтыктары: Кыргызстанда медициналык кадрларды даярдоонун сапатына карата бирдиктүү талаптар киргизилүүдө,Кыргыз Республикасынын Саламаттык сактоо министрлиги Кыргыз Республикасынын Президентинин 2025-жылдын 28-августундагы «Саламаттык сактоо тармагындагы ,Медициналык жогорку окуу жайларын мамлекеттик аккредитациялоонун жыйынтыктары: Кыргызстанда медициналык кадрларды даярдоонун сапатына карата бирдиктүү талаптар киргизилүүдө,

Кыргыз Республикасынын Саламаттык сактоо министрлиги Кыргыз Республикасынын Президентинин 2025-жылдын 28-августундагы «Саламаттык сактоо тармагындагы адистерди даярдоого мамлекеттик монополияны киргизүү жөнүндө» №250 Жарлыгын ишке ашыруунун алкагында өткөрүлгөн медициналык билим берүү уюмдарын мамлекеттик аккредитациялоонун жыйынтыгын чыгарды.

Жүргүзүлүп жаткан иштер медициналык жана фармацевтикалык кадрларды даярдоо системасын өркүндөтүүгө, медициналык билим берүүнүн сапатына карата бирдиктүү талаптарды камсыз кылууга жана саламаттык сактоо адистеринин кесиптик даярдыгынын деңгээлин жогорулатууга багытталган мамлекеттик саясаттын бир бөлүгү болуп саналат.

Президенттин Жарлыгын ишке ашыруу максатында Кыргыз Республикасынын 2026-жылдын 23-январындагы №6 «Билим берүү, илим жана саламаттык сактоо чөйрөлөрүндөгү Кыргыз Республикасынын айрым мыйзам актыларына өзгөртүүлөрдү киргизүү жөнүндө» Мыйзамы кабыл алынган. Мындан тышкары, Кыргыз Республикасынын Министрлер Кабинетинин 2026-жылдын 16-апрелиндеги №254 токтому менен орто жана жогорку кесиптик медициналык билим берүүчү уюмдарды мамлекеттик аккредитациялоону өткөрүүнүн тартиби бекитилген.

Азыркы учурда Кыргыз Республикасында медициналык билим берүү программаларын ишке ашырган 34 жогорку кесиптик билим берүү уюму медициналык кадрларды даярдоо боюнча иш жүргүзөт. Алардын ичинен 12си мамлекеттик, ал эми 22си мамлекеттик эмес билим берүү уюмдары болуп саналат.

2026-жылдын май айында Кыргыз Республикасынын Саламаттык сактоо министрлиги тарабынан медициналык билим берүү уюмдарын мамлекеттик аккредитациялоо жүргүзүлдү.

Колдонуудагы мыйзамдарга ылайык төмөнкү окуу жайлар мамлекеттик аккредитациядан өткөрүлгөн жок:

• И.К. Ахунбаев атындагы Кыргыз мамлекеттик медициналык академиясы;
• Б.Н. Ельцин атындагы Кыргыз-Россия Славян университети;
• Кыргыз-Түрк «Манас» университети.

Мамлекеттик аккредитациядан өтүү үчүн 24 билим берүү уюму арыз берген.

Мамлекеттик аккредитациянын жыйынтыгы боюнча 6 жылдык мөөнөткө төмөнкү окуу жайлар аккредитацияланды:

• Ош мамлекеттик университети;
• «Кыргызстандын Эл аралык университети» окуу-илимий-өндүрүштүк комплекси;
• Эл аралык жогорку медицина мектеби;
• С. Тентишев атындагы Азия эл аралык университети.

1 жылдык мөөнөткө аккредитацияланды:

• Ж. Баласагын атындагы Кыргыз улуттук университети;
• Жалал-Абад мамлекеттик университети;
• Б. Сыдыков атындагы Кыргыз-Өзбек эл аралык университети;
• К. Тыныстанов атындагы Ысык-Көл мамлекеттик университети;
• Жалал-Абад эл аралык университети;
• Түштүк Азия университети;
• Эл аралык Европа университети.

Баалоонун жыйынтыгы боюнча төмөнкү билим берүү уюмдары мамлекеттик аккредитациядан өтпөй калды:

• «Авиценна» Эл аралык медицина университети;
• АДАМ университети;
• Роэль Метрополитен университети;
• Альтамими эл аралык университети;
• «Ала-Тоо» эл аралык университети;
• Эл аралык медицина университети;
• Кыргыз медициналык-стоматологиялык институту;
• Салымбеков университети;
• Евразия эл аралык университети;
• Бишкек эл аралык медициналык институту;
• Медицина жана илим эл аралык университети;
• Борбордук Азия эл аралык медицина университети;
• Ош эл аралык медицина университети.

Мындан тышкары, белгиленген мөөнөттө мамлекеттик аккредитациялоо жол-жобосуна катышпаган окуу жайлар:

• И. Арабаев атындагы Кыргыз мамлекеттик университети;
• Баткен мамлекеттик университети;
• С. Нааматов атындагы Нарын мамлекеттик университети;
• К.И. Скрябин атындагы Кыргыз улуттук агрардык университети;
• Илим жана бизнес эл аралык университети;
• НРЗ Кыргыз эл аралык университети;
• «Заманбап» медициналык институту.

Мамлекеттик аккредитация окутуучулук курамдын камсыздалышы, клиникалык базалардын болушу, материалдык-техникалык ресурстар, билим берүү программалары, окуу процессин уюштуруу жана адистерди даярдоонун сапатын аныктоочу башка көрсөткүчтөрдү камтыган бирдиктүү баалоо критерийлеринин негизинде жүргүзүлөт.

Кыргыз Республикасынын Саламаттык сактоо министрлиги мамлекеттик аккредитациянын максаты мыйзам талаптарынын аткарылышын көзөмөлдөө гана эмес, биринчи кезекте келечектеги дарыгерлерди жана медицина кызматкерлерин даярдоонун сапатын жогорулатуу, бейтаптардын коопсуздугун камсыз кылуу жана улуттук медициналык билим берүү системасына болгон ишенимди бекемдөө экенин белгилейт.

Мамлекеттик аккредитацияны киргизүү медициналык билим берүүнү реформалоодогу маанилүү этап болуп саналат жана Кыргыз Республикасынын саламаттык сактоо системасынын муктаждыктарына жана эл аралык сапат стандарттарына жооп берген медициналык кадрларды даярдоонун заманбап системасын түзүүгө багытталган.