КРнын Саламаттык сактоо министри БУУнун аянтчасында пандемияларга глобалдык даярдыкты чыңдоо боюнча Кыргызстандын позициясын билдирди,Кыргыз Республикасынын Саламаттык сактоо министри Дамир Осмонов Бириккен Улуттар Уюмунун Нью-Йорк шаарындагы штаб-квартирасында өткөн БУУнун Башкы Асс,КРнын Саламаттык сактоо министри БУУнун аянтчасында пандемияларга глобалдык даярдыкты чыңдоо боюнча Кыргызстандын позициясын билдирди,

Кыргыз Республикасынын Саламаттык сактоо министри Дамир Осмонов Бириккен Улуттар Уюмунун Нью-Йорк шаарындагы штаб-квартирасында өткөн БУУнун Башкы Ассамблеясынын пандемиялардын алдын алуу, аларга даярдык көрүү жана чара көрүү боюнча жогорку деңгээлдеги жыйынынын пленардык отурумунда сөз сүйлөдү.

Өз сөзүндө министр биологиялык коркунучтарга каршы күрөшүүдө эл аралык кызматташтыкты чыңдоонун зарылдыгын белгилеп, глобалдык деңгээлде кабыл алынган милдеттенмелерден практикалык жана туруктуу чараларга өтүүнүн маанилүүлүгүнө токтолду.

Дамир Осмонов Кыргыз Республикасы Дүйнөлүк саламаттык сактоо уюмунун глобалдык саламаттык сактоо архитектурасын чыңдоодогу борбордук координациялоочу ролун колдой турганын ырастады. Ал өлкөлөрдүн вакциналарга, диагностикалык каражаттарга жана дары-дармек каражаттарына адилеттүү жана өз убагында жетүүсүнө, ошондой эле технологияларды өткөрүп берүүгө жана улуттук өндүрүштүк мүмкүнчүлүктөрдү өнүктүрүүгө өзгөчө көңүл бурду.

Министр өнүгүп келе жаткан жана деңизге чыгууга мүмкүнчүлүгү жок мамлекеттер үчүн пандемияларга даярдыктын глобалдык системасын түзүүдө адилеттүүлүк жана теңдик принциптери өзгөчө мааниге ээ экенин белгиледи.

Улуттук тажрыйбага токтолуп, ал Кыргызстанда адамдын, жаныбарлардын жана айлана-чөйрөнүн саламаттыгы маселелерин эпидемиологиялык көзөмөл жана даярдык механизмдерине интеграциялоону караган «Бирдиктүү ден соолук» («One Health») ыкмасы ырааттуу түрдө киргизилип жатканын маалымдады.

Ошондой эле министр баштапкы медициналык-санитардык жардамды трансформациялоо жана санариптик саламаттык сактоону өнүктүрүү боюнча жүргүзүлүп жаткан иштер тууралуу айтып берди. Атап айтканда, Sanarip Clinic платформасын камтыган санариптик инструменттер эпидемиологиялык көзөмөлдү өркүндөтүү жана саламаттык сактоо системасында маалыматтарды башкаруунун ыкчамдуулугун жогорулатуу үчүн колдонулууда.

Аймактык лабораториялык тармактарды модернизациялоого, медицина кызматкерлерин даярдоого жана алардын коомдук саламаттык сактоо жаатындагы өзгөчө кырдаалдарга даярдыгын жогорулатууга өзгөчө көңүл бурулду. Бул багыттагы иштер эл аралык өнөктөштөрдүн жана Пандемияларга каршы күрөшүү фондунун колдоосу менен да жүргүзүлүүдө.

Сөзүнүн соңунда Дамир Осмонов алдын алууга, эрте эскертүү системаларына, лабораториялык инфраструктурага жана улуттук саламаттык сактоо системаларынын туруктуулугун камсыз кылууга инвестиция салуунун маанилүүлүгүн белгиледи.

Кыргыз Республикасы көп тараптуу кызматташтыкка, эл аралык тилектештикке жана саламаттык сактоо кызматтары менен жалпы камтууну камсыз кылууга берилгендигин дагы бир ирет ырастады.