Бишкекте «Үй-бүлөнү пландаштыруу 2030» Консультативдик кеңешинин отуруму өттү,2026-жылдын 29-сентябрында Бишкек шаарында Кыргыз Республикасынын Саламаттык сактоо министрлиги БУУнун Калк фондунун (ЮНФПА) колдоосу менен уюштурган ,Бишкекте «Үй-бүлөнү пландаштыруу 2030» Консультативдик кеңешинин отуруму өттү,

2026-жылдын 29-сентябрында Бишкек шаарында Кыргыз Республикасынын Саламаттык сактоо министрлиги БУУнун Калк фондунун (ЮНФПА) колдоосу менен уюштурган «Үй-бүлөнү пландаштыруу 2030» (ҮП2030) Консультативдик кеңешинин жылдык отуруму болуп өттү. Отурумдун жүрүшүндө өлкөнүн репродуктивдик саламаттык сактоо жаатындагы беш улуттук милдеттенмесинин аткарылышынын жыйынтыктары чыгарылды.

Жыйынды ачып жатып, саламаттык сактоо министринин орун басары Нурбек Букуев сапаттуу консультацияларга жана заманбап контрацепция ыкмаларына жеткиликтүүлүк аялдардын ден соолугун коргоонун маанилүү шарттарынын бири экенин белгиледи. Айрыкча бул маселе аймактарда жана медициналык-социалдык тобокелдиги жогору топтор арасында өзгөчө мааниге ээ.

Иштин негизги жетишкендиктери жана багыттары:

- Сапат жана стандарттар:

Төрөттөн кийинки жана аборттон кийинки үй-бүлөнү пландаштыруу боюнча улуттук колдонмо иштелип чыгып, учурда тышкы экспертизадан өтүп жатат. Ошондой эле статистикалык эсепке алуу формалары өркүндөтүлүүдө.

- Жеткирүү чынжырлары:

ЮНФПАнын колдоосу менен саламаттык сактоонун санариптик маалыматтык системасы аркылуу контрацептивдерди эсепке алуу боюнча нускама киргизилип, 40тан ашык адис окутулду.

- Жаштар менен иштөө:

MICS изилдөөлөрүнүн (2014, 2018 жана 2023-жылдар) маалыматтарынын жана расмий статистиканын негизинде демографиялык тенденцияларга жана өспүрүмдөрдүн репродуктивдик жүрүм-турумуна кеңири талдоо жүргүзүлдү.

- Өзгөчө кырдаалдар:

С.Б. Данияров атындагы Кыргыз мамлекеттик медициналык кайра даярдоо жана квалификацияны жогорулатуу институтунда саламаттык сактоо системасынын кризистик шарттарда чара көрүүгө даярдыгы боюнча 60 сааттык окуу курсу ишке киргизилди.

- Каржылоо:

2026-жылы мамлекеттик бюджеттен спираль жана импланттарды сатып алууга 12,5 млн сом бөлүндү. Мындан тышкары, 2025-жылы ЮНФПАнын механизми аркылуу 178 миң АКШ долларына мизопростол препараты алынып, ошондой эле 104 миң АКШ долларына контрацептивдерге буюртма берилди. Мамлекеттик каржылоону этап-этабы менен көбөйтүү боюнча 2024–2030-жылдарга эсептелген жети жылдык план иштелип чыкты.

Отурумдун катышуучулары жетишкендиктерге гана эмес, чечүүнү талап кылган актуалдуу маселелерге да көңүл бурушту. Алардын катарында ведомстволор аралык кызматташтыкты күчөтүү, маалыматтарды чогултуу жана Саламаттык сактоо министрлигинин тиешелүү көрсөткүчтөрүн жаңылоо маселелери бар.

«Биргелешкен ишибиздин жыйынтыгында алдыдагы милдеттер, аларды аткарууга жооптуу тараптар жана мындан аркы мониторинг жүргүзүүнүн тартиби боюнча так түшүнүк калыптанышы керек», — деп белгиледи Кыргыз Республикасынын саламаттык сактоо министринин орун басары Нурбек Букуев.

Отурумдун жыйынтыгы боюнча милдеттенмелерди практикалык жактан ишке ашырууга басым жасоо чечими кабыл алынды. Анын ичинде жеткирүүлөрдү жакшыртуу, аймактарда кызматтардын жеткиликтүүлүгүн кеңейтүү жана ыкчам чечимдерди кабыл алуу үчүн мониторингдин тактыгын жогорулатуу багыттарына өзгөчө көңүл бурулат.