Кыргызстан менен Монголия балдар кардиохирургиясы жана трансплантология тармагындагы кызматташтыкты өнүктүрүү маселелерин талкуулашты,2026-жылдын 6-октябры. Кыргыз Республикасынын Саламаттык сактоо министри Дамир Осмонов Монголиянын Кыргыз Республикасындагы Атайын жана Ыйгарым укукту,Кыргызстан менен Монголия балдар кардиохирургиясы жана трансплантология тармагындагы кызматташтыкты өнүктүрүү маселелерин талкуулашты,

2026-жылдын 6-октябры. Кыргыз Республикасынын Саламаттык сактоо министри Дамир Осмонов Монголиянын Кыргыз Республикасындагы Атайын жана Ыйгарым укуктуу Элчиси Дэмчиг Тэгшжаргал менен жолугушту. Жолугушууда саламаттык сактоо тармагындагы кызматташтыктын келечектүү багыттары жана биргелешкен медициналык долбоорлорду ишке ашыруу мүмкүнчүлүктөрү талкууланды.

Жолугушуунун жүрүшүндө тараптар эки өлкөнүн саламаттык сактоо системаларында бир катар окшош көйгөйлөр бар экенин белгилешти. Алардын катарында жугуштуу эмес оорулардын жогорку көрсөткүчү жана алыскы аймактардын тургундары үчүн медициналык жардамдын жеткиликтүүлүгүн камсыз кылуу зарылдыгы бар. Ушуга байланыштуу оорулардын алдын алууга, саламаттык сактоону санариптештирүүгө жана телемедицинаны өнүктүрүүгө өзгөчө көңүл бурулду.

Кызматташтыктын конкреттүү багыттарынын бири катары балдар кардиохирургиясын өнүктүрүү маселеси каралды. Монголия тарап тубаса жүрөк кемтиги бар балдарга, анын ичинде алыскы аймактарда жашаган балдарга жардам көрсөтүүгө багытталган «Bundan – Heart Remembers» долбоорунун тажрыйбасы менен бөлүштү. Монголия тарап берген маалыматка ылайык, 2020–2025-жылдары балдарга 1 610дон ашык операция жасалып, 60 миңден ашык медициналык текшерүү өткөрүлгөн. Программанын алкагында Кыргызстандан барган 30дан ашык балага да жардам көрсөтүлгөн.

Министр Дамир Осмонов кызматташтыкты кеңейтүү сунушун колдоп, монголиялык кардиохирургдардын катышуусунда кыргызстандык адистер үчүн мастер-класс уюштуруу мүмкүнчүлүгүн белгиледи. Ошондой эле практикалык иштерди Кыргызстандын саламаттык сактоо уюмдарынын биринин базасында өткөрүү мүмкүнчүлүгү каралды.

Мындан тышкары, тараптар боорду трансплантациялоо жаатындагы кызматташтыкты талкуулашты. Монголия тарап эки өлкөнүн медициналык командаларынын ортосунда адистердин өз ара сапарларын уюштурууну, кыска мөөнөттүү консультацияларды өткөрүүнү жана практикалык тажрыйба алмашууну сунуштады.

Кыргыз Республикасынын Саламаттык сактоо министри Дамир Осмонов Кыргызстанда трансплантология кызматы өнүгүп жатканын эске алуу менен бул багытта көп жылдан бери иш алып барган монголиялык адистердин тажрыйбасын үйрөнүү практикалык жактан маанилүү экенин белгиледи. Ушуга байланыштуу Кыргызстандын Саламаттык сактоо министрлиги адистер тобун Монголияга жөнөтүү, ошондой эле тажрыйба алмашуу үчүн монголиялык кесиптештерди Кыргызстанда кабыл алуу мүмкүнчүлүгүн кароого даяр экенин билдирди.

«Биздин адистер трансплантация жаатында Түркиянын, Беларустун жана Россиянын тажрыйбасы менен буга чейин таанышкан. Монголиялык команда боорду трансплантациялоо багытын 2011-жылдан бери өнүктүрүп келе жатканын эске алганда, монголиялык кесиптештерибиздин тажрыйбасын үйрөнүү биз үчүн пайдалуу болот», — деп белгиледи министр.

Ошондой эле тараптар медициналык билим берүү, илим жана саламаттык сактоону санариптештирүү жаатында тажрыйба алмашууга кызыкдар экенин билдиришти. Дамир Осмонов Кыргызстан санариптик саламаттык сактоону өнүктүрүү, ошондой эле медициналык кадрларын даярдоо жана аккредитациялоо боюнча практикалык тажрыйбага ээ экенин белгилеп, аны монголиялык кесиптештери менен бөлүшүүгө даяр экенин билдирди.

Жолугушуунун жыйынтыгында тараптар кызматташтыктын келечектүү бир нече багыты боюнча ишти улантууга жана өз ара аракеттенүүнүн конкреттүү форматтарын аныктоого макулдашышты.

Министр Дамир Осмонов белгилегендей, эки өлкөнүн ортосундагы кызматташтык, биринчи кезекте, практикалык натыйжаларга — медицина кызматкерлеринин кесиптик компетенцияларын жогорулатууга, натыйжалуу ыкмаларды киргизүүгө жана бейтаптарга сапаттуу медициналык жардам көрсөтүү мүмкүнчүлүктөрүн кеңейтүүгө багытталышы керек.