КРнын Саламаттык сактоо министри Оорулардын алдын алуу жана мамлекеттик санитардык-эпидемиологиялык көзөмөл департаментинин ишмердүүлүгүнүн жыйынтыктары менен таанышты,Кыргыз Республикасынын Саламаттык сактоо министри Дамир Осмонов Оорулардын алдын алуу жана мамлекеттик санитардык-эпидемиологиялык көзөмөл департамент,КРнын Саламаттык сактоо министри Оорулардын алдын алуу жана мамлекеттик санитардык-эпидемиологиялык көзөмөл департаментинин ишмердүүлүгүнүн жыйынтыктары менен таанышты,

Кыргыз Республикасынын Саламаттык сактоо министри Дамир Осмонов Оорулардын алдын алуу жана мамлекеттик санитардык-эпидемиологиялык көзөмөл департаментине барып, мекеменин үстүбүздөгү жылдын экинчи жана үчүнчү кварталдарындагы ишмердүүлүгүнүн жыйынтыктары жана артыкчылыктуу милдеттердин аткарылышы менен таанышты.

Көңүл борборунда эпидемиологиялык көзөмөлдүн натыйжалуулугу, санитардык мыйзамдарды өркүндөтүү, милдеттүү медициналык кароолорду санариптештирүү жана саламаттык сактоо системасынын инфекциялык коркунучтарга даярдыгын жогорулатуу маселелери болду.

Отчеттук мезгилде департамент эпидемиологиялык көзөмөлдү санариптештирүү багытындагы иштерди улантты. IEPID маалыматтык системасына 21 инфекциялык оору боюнча эпидемиологиялык иликтөөнүн электрондук карталары киргизилди. Байланышта болгон адамдарды эсепке алуу жана маалымат алмашуу мүмкүнчүлүктөрүн кеңейтүүчү тармактык маалыматтык системаларды интеграциялоо боюнча иштер жүргүзүлдү. Кургак учукка жана менингококк инфекциясына карата эпидемиологиялык көзөмөлдү жөнгө салган ченемдик документтер кайра каралып, бекитилди.

Санитардык-эпидемиологиялык ченемдерди жаңылоо артыкчылыктуу багыттардын бири бойдон калууда. Учурда колдонуудагы санитардык эрежелер менен ченемдерге инвентаризация жүргүзүлүп, биринчи кезекте иштеп чыгуу зарыл болгон документтер аныкталды. Билим берүү уюмдарында тамактанууну уюштурууга карата санитардык талаптардын долбоору даярдалып, ченемдик жөнгө салууну өркүндөтүү иштери улантылууда.

2026-жылдын 1-сентябрынан тартып декреттелген контингенттин кызматкерлерин милдеттүү медициналык кароодон өткөрүү электрондук форматка өткөрүлүп, электрондук медициналык (санитардык) китепчелерди тариздөө киргизилди. Учурда баштапкы медициналык-санитардык жардам көрсөтүү уюмдарында жаңы тартиптин ишке ашырылышына мониторинг жүргүзүлүүдө.

Муну менен катар лабораториялык базаны чыңдоо иштери да улантылууда. Сүттө жана сүт азыктарында канттарды, ошондой эле тиричилик химиясынын товарларында үстүнкү-активдүү заттардын калдыктарын аныктоо ыкмалары киргизилди. Лабораториялык изилдөөлөрдүн мүмкүнчүлүктөрүн кеңейтүү жана аккредитация чөйрөсүн кеңейтүү боюнча иштер жүргүзүлүүдө.

Иш сапардын жыйынтыгында аткарылган иштердин натыйжалары, чечүүнү талап кылган көйгөйлөр жана департаменттин ишмердүүлүгүнүн мындан аркы артыкчылыктуу багыттары каралды. Алдыда оорулардын алдын алууга багытталган иштерди күчөтүүгө, санитардык талаптарды жаңылоого, санариптик көзөмөлдү өнүктүрүүгө жана коомдук саламаттык сактоого коркунуч келтирген факторлордун алдын алуу жана аларга ыкчам чара көрүү даярдыгын жогорулатууга басым жасалат.