Кыргызстан онкологиялык ооруларга чалдыккан балдарды дарылоо мүмкүнчүлүктөрүн кеңейтүүдө,2026-жылдын 21-октябрында Кыргыз Республикасынын Саламаттык сактоо министри Дамир Осмонов Өзбекстан Республикасынын Самарканд шаарында өтүп жаткан «Ба,Кыргызстан онкологиялык ооруларга чалдыккан балдарды дарылоо мүмкүнчүлүктөрүн кеңейтүүдө,

2026-жылдын 21-октябрында Кыргыз Республикасынын Саламаттык сактоо министри Дамир Осмонов Өзбекстан Республикасынын Самарканд шаарында өтүп жаткан «Балдардын бакубаттуулугуна инвестиция салуу: келечек муундардын туруктуу жана адилеттүү өнүгүүсүнө карай жол» аттуу Дүйнөлүк саммитте жана Балдар онкологиясы боюнча II эл аралык конгрессте сөз сүйлөдү.

Министр өз сөзүндө балдардын ден соолугун сактоо жана медициналык жардамдын жеткиликтүүлүгүн жогорулатуу мамлекеттик саясаттын маанилүү артыкчылыктары экенин белгиледи. Ал онкологиялык ооруларга чалдыккан балдарга медициналык жардам көрсөтүү системасын өнүктүрүүгө, ооруларды эрте аныктоого жана заманбап дарылоо ыкмаларына жеткиликтүүлүктү камсыз кылууга өзгөчө көңүл бурду.

Дамир Осмонов белгилегендей, акыркы беш жылда Кыргызстанда балдар онкологиясына мамлекеттик каржылоонун көлөмү үч эсеге көбөйдү. Балдардын рак ооруларынын улуттук реестри түзүлүп, бейтаптарды каттоо жана көзөмөлдөө системасы өркүндөтүлүүдө. Ошондой эле Бишкек жана Ош шаарларында адистештирилген медициналык жардам өнүктүрүлүүдө.

2023-жылы Кыргызстан Дүйнөлүк саламаттык сактоо уюмунун балдар арасындагы рак ооруларына каршы күрөшүү боюнча Глобалдык демилгесине кошулуп, 2030-жылга чейин онкологиялык ооруларга чалдыккан балдардын жашап кетүү көрсөткүчүн кеминде 60 пайызга жеткирүү боюнча эл аралык максатты колдогон.

2025-жылы өлкөдө биринчи жолу аутологиялык жилик чучугун трансплантациялоо операциясынын жаш өспүрүмгө жасалышы маанилүү жетишкендик болду. Мындан тышкары, 2021-жылы онкологиялык жардамдын Мамлекеттик кепилдиктер программасына киргизилиши медициналык жардамдын жеткиликтүүлүгүн жогорулатуудагы маанилүү кадамдардын бири болду.

Ооруларды эрте аныктоо жана дарылоонун жеткиликтүүлүгү

Министр ооруну өз убагында аныктоо дарылоонун натыйжасына олуттуу таасир этерин баса белгиледи. Ушуга байланыштуу баштапкы медициналык-санитардык жардам көрсөтүүчү адистердин квалификациясын жогорулатуу, ата-энелерге оорунун алгачкы кооптуу белгилери тууралуу маалымат берүү жана бейтаптарды тиешелүү медициналык мекемелерге жөнөтүү тартибин өркүндөтүү маанилүү.

Медициналык жардамга бирдей жеткиликтүүлүктү камсыз кылууга, аймактар аралык кызматташууну өнүктүрүүгө, телемедициналык консультацияларды колдонууга, ошондой эле дарылоо жана реабилитация мезгилинде балдарга жана алардын үй-бүлөлөрүнө психологиялык жана социалдык колдоо көрсөтүүгө өзгөчө көңүл бурулууда.

Министр Дамир Осмонов өз сөзүндө илимий изилдөөлөрдү өнүктүрүү, адистерди даярдоо, клиникалык тажрыйба алмашуу жана заманбап дарылоо ыкмаларын киргизүү үчүн мамлекеттердин жана эл аралык өнөктөштөрдүн күч-аракеттерин бириктирүү зарылдыгын белгиледи.

2026-жылдын сентябрь айында Кыргыз Республикасынын Саламаттык сактоо министрлиги Глобалдык платформага кошулуу үчүн өтүнмө жөнөткөн. Кыргызстан бул демилгеге катышуу балдардын зарыл дары-дармектерге жеткиликтүүлүгүн кеңейтүүгө жана өлкөдөгү онкологиялык жардам көрсөтүү системасын чыңдоого өбөлгө түзөт деп күтөт.

«Биз үчүн дарыланууга муктаж болгон ар бир бала жашаган жерине жана үй-бүлөсүнүн материалдык мүмкүнчүлүктөрүнө карабастан, зарыл дары-дармектерди өз убагында алуу мүмкүнчүлүгүнө ээ болушу принципиалдуу мааниге ээ», — деп баса белгиледи министр.

Сөзүнүн соңунда Дамир Осмонов балдардын ден соолугуна жана бакубаттуулугуна инвестиция салуу адамдык капиталды өнүктүрүүгө, туруктуу өнүгүүгө жана өлкөнүн келечегине салынган салым экенин белгиледи.