Кыргызстан менен АКШдагы Ыйык Иуда балдар ооруканасы балдар онкологиясы жана онкогематологиясы жаатындагы кызматташтыкты бекемдөөдө,Самарканд шаарында өткөн балдар онкологиясы боюнча эл аралык саммиттин алкагында Кыргыз Республикасынын Саламаттык сактоо министри Дамир Осмонов дүйнө,Кыргызстан менен АКШдагы Ыйык Иуда балдар ооруканасы балдар онкологиясы жана онкогематологиясы жаатындагы кызматташтыкты бекемдөөдө,

Самарканд шаарында өткөн балдар онкологиясы боюнча эл аралык саммиттин алкагында Кыргыз Республикасынын Саламаттык сактоо министри Дамир Осмонов дүйнөгө белгилүү АКШдагы Ыйык Иуда балдар изилдөө ооруканасынын (St. Jude Children’s Research Hospital) өкүлдөрү менен жолугушту.

Жолугушуунун жүрүшүндө тараптар Кыргыз Республикасында онкологиялык жана онкогематологиялык ооруларга чалдыккан балдарга көрсөтүлүүчү медициналык жардамдын жеткиликтүүлүгүн жана сапатын жогорулатууга багытталган эл аралык кызматташтыкты мындан ары өнүктүрүүгө даяр экендиктерин ырасташты.

Балдар арасындагы рак ооруларына каршы күрөшүү боюнча Глобалдык платформага Кыргызстандын катышуу мүмкүнчүлүктөрүнө өзгөчө көңүл бурулду. Аталган платформа балдардагы залалдуу шишик ооруларын аныктоо жана дарылоо системасын өркүндөтүү үчүн мамлекеттердин жана эл аралык өнөктөштөрдүн күч-аракеттерин бириктирүүгө багытталган.

Жолугушуунун катышуучулары мындан аркы кызматташуунун багыттарын да талкуулашты. Алардын катарында улуттук клиникалык колдонмолорду иштеп чыгуу жана жаңылоо, заманбап эл аралык дарылоо протоколдорун улуттук саламаттык сактоо системасынын шарттарына ылайыкташтыруу, балдар онкологдорунун жана онкогематологдорунун квалификациясын жогорулатуу, ошондой эле адистештирилген медициналык жардамга муктаж балдар менен иштеген медайымдарды окутуу маселелери каралды.

Кызматташуунун өзүнчө багыты катары медициналык адистердин кесиптик дараметин чыңдоо, илимий-изилдөө иштерин өнүктүрүү жана онкологиялык ооруларга чалдыккан балдарга медициналык жардам көрсөтүүнү уюштуруунун заманбап ыкмаларын киргизүү белгиленди.

Ыйык Иуда ооруканасынын эл аралык байланыштар боюнча директорунун орун басары Карлос Родригес-Галиндо Кыргыз Республикасынын балдар онкологиясы жана онкогематологиясы жаатындагы өнүгүү мүмкүнчүлүктөрү жогору экенин белгилеп, жетишилген ийгиликтердин маанилүүлүгүнө жана адистештирилген медициналык жардам көрсөтүүнүн улуттук системасын мындан ары чыңдоо келечегине токтолду.

Кыргыз Республикасы балдарга онкологиялык жардам көрсөтүүнүн улуттук системасын ырааттуу өнүктүрүүдө. Акыркы жылдары ооруларды аныктоо жана дарылоо мүмкүнчүлүктөрү кеңейтилип, мамлекеттик каржылоо көбөйтүлдү, балдардын онкологиялык ооруларынын улуттук реестри түзүлдү, клиникалык протоколдор бекитилип, балдардагы онкологиялык ооруларды эрте аныктоо инструменттери киргизилүүдө. 2023-жылы өлкөнүн Дүйнөлүк саламаттык сактоо уюмунун Балдар арасындагы рак ооруларына каршы күрөшүү боюнча глобалдык демилгесине (Global Initiative for Childhood Cancer, GICC) кошулушу маанилүү этап болду.

Ыйык Иуда ооруканасы менен кызматташуу эл аралык тажрыйбаны киргизүүгө, медициналык адистердин кесиптик компетенцияларын өнүктүрүүгө жана Кыргызстанда балдар онкологиясы системасын мындан ары өркүндөтүүгө кошумча мүмкүнчүлүктөрдү түзөт.

Кызматташуунун жалпы максаты — Кыргызстандагы онкологиялык ооруга чалдыккан ар бир балага жашаган жерине жана үй-бүлөсүнүн социалдык абалына карабастан, ооруну өз убагында аныктоону, заманбап дарылоого жеткиликтүүлүктү жана айыгууга мүмкүнчүлүктү камсыз кылуу.