Кыргызстан балдардын ден соолугун коргоонун жеткиликтүү жана туруктуу системасын өнүктүрүүдө,2026-жылдын 22-октябрында Кыргыз Республикасынын Саламаттык сактоо министри Дамир Осмонов Самарканд шаарында өтүп жаткан «Балдардын бакубаттуулугуна и,Кыргызстан балдардын ден соолугун коргоонун жеткиликтүү жана туруктуу системасын өнүктүрүүдө,

2026-жылдын 22-октябрында Кыргыз Республикасынын Саламаттык сактоо министри Дамир Осмонов Самарканд шаарында өтүп жаткан «Балдардын бакубаттуулугуна инвестиция салуу: келечек муундардын туруктуу жана адилеттүү өнүгүүсүнө карай жол» аттуу Дүйнөлүк саммиттин тематикалык пленардык жыйынында сөз сүйлөдү.

Министр өз сөзүндө Кыргызстанда балдардын ден соолугун коргоо жаатындагы артыкчылыктуу багыттарды белгиледи. Алардын катарына баштапкы медициналык-санитардык жардамды өнүктүрүү, ооруларды эрте аныктоо, телемедицинаны жайылтуу жана адистештирилген дарылоонун жеткиликтүүлүгүн жогорулатуу кирет.

Өлкөдө неонатология боюнча 23 клиникалык протокол жана сунуштама киргизилип, 1 500дөн ашык медицина кызматкери балдар ооруларын интеграцияланган түрдө жүргүзүү боюнча окутуудан өттү. ЮНИСЕФтин жана Дүйнөлүк саламаттык сактоо уюмунун колдоосу менен медицина кызматкерлери үчүн улуттук чөнтөк маалымдама китепчеси ишке киргизилди.

Алыскы аймактарда медициналык кызматтардын жеткиликтүүлүгүн жогорулатуу максатында Telemed.kg платформасы аркылуу телемедицина өнүктүрүлүүдө. Учурда ал Жалал-Абад, Баткен жана Ош облустарынын 11 районун камтыйт.

Кыргызстан балдарга жогорку технологиялуу медициналык жардам көрсөтүү мүмкүнчүлүктөрүн да кеңейтүүдө. Өлкөдө онкологиялык оорусу бар балага аутологиялык сөөк чучугун трансплантациялоо операциясы жасалган. Ошондой эле 2018-жылдан бери угуусу олуттуу бузулган балдарга 200дөн ашык кохлеардык имплантация жүргүзүлгөн. Неонаталдык скринингди, эрте кийлигишүү кызматтарын жана реабилитациялык жардамды өнүктүрүү иштери улантылууда.

Министр Дамир Осмонов саламаттык сактоо системасын туруктуу өнүктүрүү үчүн узак мөөнөттүү каржылоо, медициналык кадрларды даярдоо жана шаарлар менен айыл жерлеринин ортосунда сапаттуу медициналык жардамдын жеткиликтүүлүгүндөгү айырмачылыктарды кыскартуу зарылдыгын баса белгиледи.