Кыргызстан менен Түркия жогорку технологиялуу медицина жана дары-дармектердин жеткиликтүүлүгүн камсыз кылуу жаатындагы кызматташтыкты кеңейтүүнү талкуулашты,2026-жылдын 29–31-октябрында Стамбул шаарында өтүп жаткан Түрк медицинасынын дүйнөсүнүн 12-конгрессинин алкагында Кыргыз Республикасынын Саламаттык са,Кыргызстан менен Түркия жогорку технологиялуу медицина жана дары-дармектердин жеткиликтүүлүгүн камсыз кылуу жаатындагы кызматташтыкты кеңейтүүнү талкуулашты,

2026-жылдын 29–31-октябрында Стамбул шаарында өтүп жаткан Түрк медицинасынын дүйнөсүнүн 12-конгрессинин алкагында Кыргыз Республикасынын Саламаттык сактоо министри Дамир Осмонов Түркия Республикасынын Саламаттык сактоо министри Кемал Мемишоглу менен эки тараптуу жолугушуу өткөрдү.

Жолугушуунун негизги темалары Кыргызстан менен Түркиянын саламаттык сактоо жаатындагы практикалык кызматташтыгын кеңейтүү, медицинанын жогорку технологиялуу багыттарын өнүктүрүү, медициналык кадрларды даярдоо жана калк үчүн дары-дармектердин жеткиликтүүлүгүн жогорулатуу маселелери болду.

Талкуунун негизги багыттарынын бири роботтоштурулган хирургия жаатындагы кызматташтыкты өнүктүрүү болду. Тараптар кыргызстандык адистердин квалификациясын жогорулатуу, ошондой эле түркиялык кесиптештери менен биргеликте окутууларды уюштуруу жана тажрыйба алмашуу мүмкүнчүлүктөрүн карашты. Мындан тышкары, «Гамма-бычак» (Gamma Knife) технологиясы боюнча медициналык кадрларды даярдоо жана трансплантология жаатындагы кызматташтыкты мындан ары өнүктүрүү келечеги талкууланды.

Жолугушуунун күн тартибинде калкты жеткиликтүү дары-дармектер менен камсыз кылуу маселеси да маанилүү орунду ээледи. Атап айтканда, дары-дармек каражаттарын борборлоштурулган тартипте сатып алуу жаатындагы кызматташтыктын мүмкүнчүлүктөрү талкууланды. Түрк тарап Кыргызстан тарабынан сунушталган зарыл дары-дармектердин тизмесин карап чыгып, аларды кыйла ыңгайлуу баада жеткирүү мүмкүнчүлүктөрүн изилдөөгө даяр экенин билдирди.

Мындай кызматташтык ата мекендик саламаттык сактоо системасын мындан ары өнүктүрүү, медициналык кызматкерлердин кесиптик мүмкүнчүлүктөрүн кеңейтүү жана ооруларды аныктоо менен дарылоонун заманбап технологияларын өздөштүрүү үчүн өзгөчө мааниге ээ.

Жолугушуунун жыйынтыгында тараптар кыргыз-түрк кызматташтыгын мындан ары өнүктүрүүгө жана белгиленген багыттар боюнча өз ара аракеттенүүнү улантууга кызыкдар экендиктерин ырасташты.

Кыргызстан менен Түркияны көп жылдык өнөктөштүк мамилелер байланыштырып, бул кызматташтык саламаттык сактоо тармагында да ырааттуу өнүгүп келет. Тажрыйба алмашуу, кесиптик эксперттик колдоону тартуу жана медицинанын алдыңкы тажрыйбаларын өздөштүрүү тармакты модернизациялоого жана Кыргыз Республикасында медициналык жардамдын сапатын жогорулатууга кошумча мүмкүнчүлүктөрдү түзөт.