САЛАМАТТЫК САКТОО МИНИСТРЛИГИНДЕ ЖАРАНДАРДЫН КАЙРЫЛУУЛАРЫ МЕНЕН ИШТӨӨ БОЮНЧА МОНИТОРИНГ ЖҮРГҮЗҮЛДҮ,Кыргыз Республикасынын Президентине караштуу Антикоррупциялык ишкердик кеңешинин эксперттик тобу «Башкы Элдик көзөмөл» коомдук уюмунун өкүлдөрү менен ,САЛАМАТТЫК САКТОО МИНИСТРЛИГИНДЕ ЖАРАНДАРДЫН КАЙРЫЛУУЛАРЫ МЕНЕН ИШТӨӨ БОЮНЧА МОНИТОРИНГ ЖҮРГҮЗҮЛДҮ,

Кыргыз Республикасынын Президентине караштуу Антикоррупциялык ишкердик кеңешинин эксперттик тобу «Башкы Элдик көзөмөл» коомдук уюмунун өкүлдөрү менен биргеликте Кыргыз Республикасынын Саламаттык сактоо министрлигинде жарандардын кайрылуулары менен иштөөнүн уюштурулушуна мониторинг жүргүздү.

Иш-чаранын максаты — жарандардын кайрылууларын кароонун сапатын жогорулатууга, калк менен кайтарым байланышты жакшыртууга жана коррупциялык тобокелдиктердин алдын алууга көмөктөшүү.

Мониторингдин жүрүшүндө төмөнкү маселелер каралды:

• кайрылууларды өз убагында жана ар тараптуу кароо, мыйзамда белгиленген мөөнөттөрдүн сакталышы;

• кайтарым байланыш каналдарынын жеткиликтүүлүгү;

• министрликтин жетекчилиги тарабынан жарандарды жеке кабыл алуунун уюштурулушу;

• кайталанган кайрылууларды аныктоо жана талдоо механизмдери;

• кайрылууларды кароонун мөөнөттөрүн негизсиз создуктуруу жана жол-жоболордун жетиштүү ачык-айкын болбошу сыяктуу коррупциялык тобокелдиктердин алдын алуу чаралары.

Эксперттик топту Кыргыз Республикасынын Президентине караштуу Антикоррупциялык ишкердик кеңешинин башкы эксперти Замир Айылчыев жетектеди. Топтун курамына «Башкы Элдик көзөмөл» коомдук уюмунун жетекчиси Айдар Сейталиев, аталган уюмдун эксперттери Айнура Дубанаева жана Эсенбек Дуйшеев кирди.

Мындай мониторинг мамлекеттик органдар менен жарандык коомдун кызматташтыгын бекемдөөгө, кайрылуулар менен иштөөдөгү көйгөйлөрдү аныктоого жана аларды чечүү боюнча практикалык сунуштарды даярдоого багытталган. Жарандардын кайрылууларына өз убагында жана негиздүү жооп берүү саламаттык сактоо системасына болгон коомдук ишенимди бекемдөөнүн маанилүү шарты болуп саналат.

Иш-чара Кыргыз Республикасынын Президентинин 2024-жылдын 5-июнундагы № 137 Жарлыгы менен бекитилген Кыргыз Республикасында коррупцияга каршы аракеттенүү боюнча 2025–2030-жылдарга мамлекеттик стратегияны жана аны ишке ашыруу боюнча 2025–2027-жылдарга иш-чаралар планын аткаруунун алкагында өткөрүлдү.