Онкологиядагы жасалма интеллект: Кыргызстан заманбап диагностиканын мүмкүнчүлүктөрүн кеңейтүүдө,Улуттук онкология жана гематология борборуна жасалма интеллект технологиялары менен жабдылган Mindray Resona R9 үлгүсүндөгү төрт премиум класстагы уль,Онкологиядагы жасалма интеллект: Кыргызстан заманбап диагностиканын мүмкүнчүлүктөрүн кеңейтүүдө,

Улуттук онкология жана гематология борборуна жасалма интеллект технологиялары менен жабдылган Mindray Resona R9 үлгүсүндөгү төрт премиум класстагы ультрадобуштук аппарат орнотулду

Бишкек шаары, 2026-жылдын 5-ноябры.

Кыргыз Республикасынын Саламаттык сактоо министрлигине караштуу Улуттук онкология жана гематология борборуна жасалма интеллект технологиялары менен жабдылган Mindray Resona R9 үлгүсүндөгү төрт заманбап ультрадобуштук аппарат орнотулду.

Төрт заманбап ультрадобуштук аппаратты сатып алууга каражат Кыргыз Республикасынын Президентинин Администрациясы тарабынан максаттуу түрдө бөлүнгөн. Mindray Resona R9 үлгүсүндөгү бир аппараттын баасы 8 млн 400 миң сомду түзөт.

Жаңы аппараттар орнотулганга чейин борбордо төрт ультрадобуштук диагностикалык система иштеп келген. Бейтаптардын агымынын көптүгүнө байланыштуу бул диагностикалык бөлүмгө кошумча күч келтирип, текшерүүдөн өтүүнү күтүү убактысынын узарышына алып келген. Дагы төрт заманбап аппараттын келиши мекеменин диагностикалык мүмкүнчүлүктөрүн кеңейтүүгө, ультрадобуштук изилдөөлөрдүн жеткиликтүүлүгүн жогорулатууга жана онкологиялык бейтаптарга медициналык жардам көрсөтүү шарттарын жакшыртууга мүмкүндүк берет.

Саламаттык сактоо министринин орун басары Нурбек Букуев диагностикалык жабдууларды жаңылоо адистештирилген медициналык жардамдын сапатын жогорулатуунун маанилүү бөлүгү экенин белгиледи.

«Биз үчүн медициналык мекемелердин материалдык-техникалык базасын жаңылоо гана эмес, диагностиканын мүмкүнчүлүктөрүн кеңейтүү да принципиалдуу мааниге ээ. Бул бейтаптарга зарыл болгон текшерүүлөрдөн өз убагында жана заманбап технологиялардын жардамы менен өтүүгө шарт түзөт.

Жасалма интеллект технологияларын киргизүү өзгөчө маанилүү. Алар дарыгерлердин ишинде кошумча интеллектуалдык жардамчы курал болуп кызмат кылат. Ошондой эле эхокардиографиялык изилдөөлөрдү түздөн-түз онкологиялык борбордо жүргүзүү мүмкүнчүлүгү пайда болууда. Бул бейтаптардын, анын ичинде шишикке каршы дарылоо курсунан өтүп жаткан адамдардын абалын комплекстүү баалоого жана жүрөк-кан тамыр системасындагы мүмкүн болгон өзгөрүүлөрдү өз убагында көзөмөлдөөгө мүмкүндүк берет.

Биздин милдет — заманбап медициналык технологияларды ырааттуу киргизүү, адистердин кесиптик мүмкүнчүлүктөрүн жогорулатуу жана эң башкысы, бейтаптарга сапаттуу, өз убагындагы жана коопсуз медициналык жардамдын жеткиликтүүлүгүн камсыз кылуу», — деп баса белгиледи саламаттык сактоо министринин орун басары Нурбек Букуев.

Жаңы аппараттардын негизги өзгөчөлүктөрүнүн бири — жасалма интеллект технологияларынын интеграцияланышы. Алар дарыгерге интеллектуалдык жардамчы катары ультрадобуштук сүрөттөрдү талдоого, шектүү патологиялык очокторду аныктоого, ар кандай органдардагы жана ткандардагы өзгөрүүлөрдү баалоого жардам берет.

Бул технологияларды калкан сымал безди, сүт бездерин, боорду, бөйрөктү, уйку безин, көк боорду жана башка органдарды изилдөөдө колдонууга болот. Бул адистердин диагностикалык мүмкүнчүлүктөрүн кеңейтип, патологиялык өзгөрүүлөрдү өз убагында аныктоого кошумча шарт түзөт.

Ошол эле учурда изилдөөнүн жыйынтыгын акыркы баалоо, диагноз коюу жана клиникалык чечим кабыл алуу дарыгердин компетенциясында калат.

Дагы бир маанилүү жаңылык — эхокардиографияны, башкача айтканда, жүрөктү ультрадобуш аркылуу текшерүүнү жүргүзүү мүмкүнчүлүгүнүн пайда болушу. Буга чейин Улуттук онкология жана гематология борборунда мындай изилдөө жүргүзүлгөн эмес.

Жаңы аппараттар жүрөк-кан тамыр системасынын абалын баалоого арналган атайын кардиологиялык датчиктер жана программалык камсыздоо менен жабдылган.

Бул химиотерапиядан өтүп жаткан онкологиялык бейтаптар үчүн өзгөчө маанилүү. Анткени шишикке каршы айрым дары-дармектер жүрөк булчуңуна жана жүрөк-кан тамыр системасына таасир этиши мүмкүн. Эми адистер дарылоону баштаганга чейин, химиотерапия учурунда жана операциядан кийинки мезгилде жүрөктүн иштешин баалап, мүмкүн болгон өзгөрүүлөрдү өз убагында аныктап, бейтаптардын абалын көзөмөлдөй алышат.

Бипландык ультрадобуштук диагностиканы киргизүү да өзгөчө мааниге ээ. Орнотулган төрт аппараттын экөө изилденип жаткан түзүлүштөрдү бир эле учурда эки тегиздикте көрсөтүүгө мүмкүндүк берген атайын бипландык датчиктер менен жабдылган.

Кыргызстандын онкологиялык практикасында бул технологияны простата безин жана жамбаш көңдөйүндөгү органдарды изилдөөдө алгачкы жолу колдонуу пландалууда. Ал патологиялык өзгөрүүлөрдү аныктоодо, простата безинин ооруларын диагностикалоодо жана так багытталган биопсия жүргүзүүдө маанилүү роль ойнойт.

Мындан тышкары, жаңы Mindray Resona R9 системалары контрасттык ультрадобуштук изилдөөлөрдү жана эластографияны жүргүзүүгө, шишик түзүлүштөрүнүн кан менен камсыз болушун баалоого жана кан тамыр системасынын абалын изилдөөгө мүмкүндүк берет.

Заманбап диагностикалык жабдуулардын орнотулушу Улуттук онкология жана гематология борборун жаңылоодогу, адистештирилген медициналык жардамдын мүмкүнчүлүктөрүн кеңейтүүдөгү жана онкологиялык практикада инновациялык технологияларды киргизүүдөгү маанилүү кадам болуп саналат.