СААТОВА ГҮЛИ МИРАХМАТОВНАНЫН ЖАРКЫН ЭЛЕСИНЕ,2026-жылдын 7-ноябрында Бишкек шаарында медицина илимдеринин доктору, профессор, көрүнүктүү окумуштуу, жогорку квалификациялуу дарыгер-педиатр, кардио,СААТОВА ГҮЛИ МИРАХМАТОВНАНЫН ЖАРКЫН ЭЛЕСИНЕ,

2026-жылдын 7-ноябрында Бишкек шаарында медицина илимдеринин доктору, профессор, көрүнүктүү окумуштуу, жогорку квалификациялуу дарыгер-педиатр, кардиолог жана ревматолог, өмүрүнүн 45 жылдан ашык мезгилин медицинага, илимге жана балдардын ден соолугун коргоого арнаган Саатова Гули Мирахматовна дүйнөдөн кайтты.

Гули Мирахматовнанын дүйнөдөн кайтышы Кыргыз Республикасынын медициналык коомчулугу, Эне жана баланы коргоо улуттук борборунун жамааты, кесиптештери, шакирттери жана бейтаптары үчүн орду толгус жоготуу болду.

1979-жылы Анжиян мамлекеттик медициналык институтун артыкчылык диплому менен аяктаган. 1987-жылы кандидаттык, ал эми 1998-жылы докторлук диссертациясын ийгиликтүү коргоп, медицина илимдеринин доктору илимий даражасына ээ болгон.

1998-жылдан тартып анын кесиптик ишмердүүлүгү Кыргыз акушердик жана педиатрия илим-изилдөө институту, кийинчерээк Эне жана баланы коргоо улуттук борбору менен байланышкан. 2003-жылдан баштап ревматология жана жүрөктүн ревматикалык эмес оорулары бөлүмүн жетектеп, ар кайсы жылдары илим боюнча директордун орун басары жана жетектөөчү илимий кызматкер кызматтарын аркалаган.

Анын илимий ишмердүүлүгүнүн негизги багыттары балдардагы ревматикалык оорулардын клиникалык өзгөчөлүктөрүн изилдөө, аларды эрте аныктоо, алдын ала божомолдоо жана дарылоо ыкмаларын өркүндөтүү болгон. Ал Кыргызстанда балдар кардиоревматологиясынын өнүгүшүнө зор салым кошуп, 180ден ашык илимий эмгектин, монографиялардын, окуу куралдарынын жана усулдук колдонмолордун автору болгон.

Гули Мирахматовна жаш адистерди жана илимий кадрларды даярдоого өзгөчө көңүл бурган. Анын жетекчилиги алдында шакирттери кандидаттык диссертацияларын ийгиликтүү коргошкон. Ал 2008-жылга чейин Кыргыз Республикасынын башкы балдар ревматологу кызматын аркалап, 2007-жылдан тартып Борбордук Азия жана Казакстан ревматологдор ассоциациясынын вице-президенти болгон. Ошондой эле Кыргызстандын кардиологдор ассоциациясынын вице-президенти кызматын да ээлеген.

Гүли Мирахматовна таланттуу окумуштуу, жогорку квалификациялуу дарыгер, тажрыйбалуу жетекчи жана акылман устат болгон. Ал кесипке берилгендиги, эмгекчилдиги, принципиалдуулугу, жоопкерчилиги жана кичинекей бейтаптарга болгон өзгөчө камкордугу менен айырмаланган.

Гүли Мирахматовнанын дүйнөдөн кайтышы ата мекендик медицина илими жана саламаттык сактоо тармагы үчүн чоң жоготуу болду. Анын илимий мурасы, кесиптик жетишкендиктери, тарбиялап өстүргөн шакирттери жана көп жылдык ак ниет эмгеги Кыргызстандын медицина тарыхында түбөлүккө сакталат.

Гүли Мирахматовнанын жакындарына, туугандарына, кесиптештерине, шакирттерине жана аны таанып, сыйлап-урматтаган бардык адамдарга терең кайгыруу менен көңүл айтабыз.

Саатова Гүли Мирахматовнанын жаркын элеси жүрөгүбүздө түбөлүккө сакталат.