Кыргыз Республикасында курч респиратордук вирустук инфекциялар жана сасык тумоо боюнча жумалык эпидемиологиялык кырдаал,Кыргыз Республикасынын Саламаттык сактоо министрлигине караштуу Оорулардын алдын алуу жана мамлекеттик санитардык-эпидемиологиялык көзөмөл департамент,Кыргыз Республикасында курч респиратордук вирустук инфекциялар жана сасык тумоо боюнча жумалык эпидемиологиялык кырдаал,

Кыргыз Республикасынын Саламаттык сактоо министрлигине караштуу Оорулардын алдын алуу жана мамлекеттик санитардык-эпидемиологиялык көзөмөл департаменти курч респиратордук вирустук инфекциялардын (КРВИ), сасык тумоонун жана коронавирус инфекциясынын жайылышына жума сайын мониторинг жүргүзүүнү улантууда.

Ыкчам маалыматтарга ылайык, 2026-жылдын 45-жумасында (02.11.26–08.11.26) республика боюнча КРВИ жана сасык тумоонун 10 900 учуру катталган (интенсивдүү көрсөткүчү – 148,4). Бул көрсөткүч өткөн жумага (44-жумада интенсивдүү көрсөткүч – 142,1) салыштырмалуу 4,4%га, ал эми 2025-жылдын ушул мезгилине салыштырмалуу 1,6 эсеге жогору.

Ооругандардын жалпы санынын 71,1%ын 14 жашка чейинки балдар түзөт (7 752 учур).

Бишкек, Ош жана Токмок шаарларында тандалма эпидемиологиялык көзөмөл уланууда. Лабораториялык мониторингдин маалыматына ылайык, 2026-жылдын 40–45-жумаларында алынган 464 үлгүнүн 9,7%ы (55 үлгү) оң жыйынтык көрсөткөн.

Респиратордук вирустардын айлануусу байкалууда. Алардын арасында риновирустар басымдуулук кылат – 47,3%, парагрипп вирустары – 22,2%, аденовирустар – 13,3%, сезондук коронавирус – 9,9%, бокавирустар – 5,8% жана башка вирустар – 1,5%.

Сасык тумоого каршы эмдөө

Сезондук сасык тумоонун алдын алуу максатында Кыргыз Республикасынын Саламаттык сактоо министрлиги тарабынан «Гриппол+» вакцинасынын 63 734 дозасы сатылып алынган.

Учурда республиканын бардык аймактарында сасык тумоого каршы эмдөө уланууда. Биринчи кезекте тобокелдик тобуна кирген адамдар эмделүүдө:

өнөкөт оорулары бар адамдар;
65 жаштан жогорку жарандар;
кош бойлуу аялдар;
көп ооруган балдар;
медицина кызматкерлери.

Аталган жарандар үчүн эмдөө үй-бүлөлүк медицина борборлорунда акысыз жүргүзүлөт.

Мындан тышкары, каалоочулар 12 жеке медициналык уюмда акы төлөп эмдөөдөн өтө алышат. Алардын катарына «Кроха», «Малыш», «ЦАДМИР», «Поликлиника-312», «Интермедикал», «Комфорт Медик», «Эдельвейс», «Клиника 21», «Авиценна», «Чипенко», «Мама Доктор» жана «Аллерго Эксперт» кирет. Эмдөөнүн баасы бир доза үчүн 450 сомдон 1 100 сомго чейин.

КРВИ жана сасык тумоонун алдын алуунун негизги чаралары

Кыргыз Республикасынын Саламаттык сактоо министрлиги калкка төмөнкү алдын алуу чараларын сактоону сунуштайт:

кол гигиенасын сактоо, колду самындап үзгүлтүксүз жуу;
бөлмөлөрдү үзгүлтүксүз желдетип, нымдуу тазалоо жүргүзүү;
респиратордук гигиенаны сактоо, жөтөлгөндө жана чүчкүргөндө оозду жана мурунду жабуу;
адамдар көп чогулган жерлерде, айрыкча респиратордук инфекциянын белгилери байкалганда медициналык беткап колдонуу;
организмди үшүп калуудан сактоо;
оорунун белгилери пайда болгондо үйдө калып, өз убагында медициналык жардамга кайрылуу;
КРВИ белгилери бар балдарды айыкканга чейин мектепке жана бала бакчага жибербөө;
эмгек жана эс алуу режимин сактоо, туура тамактануу жана физикалык активдүүлүктү колдоо.

Калкка консультациялык жардам көрсөтүү

Балдарга өз убагында медициналык жардам көрсөтүү максатында үй-бүлөлүк медицина борборлорунда КРВИ маселелери боюнча адистештирилген колл-борборлор уюштурулган.

Балада оорунун алгачкы белгилери пайда болгондо ата-энелер аралыктан консультация алуу үчүн кайрылып, медицина адистеринен сунуштарды жана кошумча текшерүүдөн өтүү же ооруканага жаткыруу зарылдыгы тууралуу маалымат ала алышат.

Кыргыз Республикасынын Саламаттык сактоо министрлиги жарандарды сасык тумоого каршы эмдөөдөн өз убагында өтүүгө, алдын алуу чараларын сактоого жана оорунун белгилери пайда болгондо медициналык жардамга кайрылууга чакырат.

Өзүңүзгө жана жакындарыңызга кам көрүңүз!