28 бала угуу мүмкүнчүлүгүнө ээ болду: Катардын дарыгерлери Кыргызстанда кайрымдуулук операцияларын жүргүзүштү,2026-жылдын 5-ноябрынан 9-ноябрына чейин Улуттук Эне жана баланы коргоо борборунун Оториноларингология бөлүмүндө Катар мамлекетинен келген дарыгерлер ,28 бала угуу мүмкүнчүлүгүнө ээ болду: Катардын дарыгерлери Кыргызстанда кайрымдуулук операцияларын жүргүзүштү,

2026-жылдын 5-ноябрынан 9-ноябрына чейин Улуттук Эне жана баланы коргоо борборунун Оториноларингология бөлүмүндө Катар мамлекетинен келген дарыгерлер тобу тарабынан угуусу начар балдарга кохлеардык имплантация боюнча кайрымдуулук операциялары жүргүзүлдү.

5-ноябрда келген адистер операцияга талапкер болгон 35 баланы медициналык кароодон өткөрүштү. Балдардын ден соолугунун абалы жана тиешелүү диагностикалык изилдөөлөрдүн жыйынтыктары эске алынып, алардын ичинен 28 балага операция жасоого уруксат берилди. Калган балдардан КРВИ, отит жана алдын ала дарылоону талап кылган башка убактылуу медициналык каршы көрсөтмөлөр аныкталды.

Жүргүзүлгөн операциялардын жыйынтыгында 28 балага кохлеардык имплант ийгиликтүү орнотулду. Мындан тышкары, эки балага ата-энелеринин өз каражаттарынын эсебинен дагы бирден кошумча имплант орнотулду. Ошентип, кайрымдуулук миссиясынын алкагында жалпы 30 кохлеардык имплантация жасалды.

Операциядан кийин балдар медициналык көзөмөлдө болушту. Операция учурунда жана андан кийинки мезгилде олуттуу татаалдашуулар катталган жок.

9-ноябрда катарлык дарыгерлер тобун узатуу иш-чарасы өткөрүлдү. Анын алкагында Улуттук эне жана баланы коргоо борборунун жетекчилиги менен чет элдик адистердин жолугушуусу уюштурулуп, аткарылган иштердин жыйынтыктары талкууланды. Ошондой эле балдар жана алардын ата-энелери менен коштошуу жолугушуусу өткөрүлдү.

Кохлеардык имплантация - угуусу катуу бузулган балдарга үндөрдү кабыл алууга мүмкүнчүлүк берген жогорку технологиялуу медициналык жардамдын түрү. Бул ыкма балдардын сүйлөө жөндөмүн өнүктүрүүгө, билим алуусуна жана коомго толук кандуу аралашуусуна өбөлгө түзөт.

Улуттук Эне жана баланы коргоо борбору Катар мамлекетинен келген дарыгерлерге, кайрымдуулук фондунун өкүлдөрүнө жана бул гуманитардык миссияны уюштурууга жана ишке ашырууга салым кошкон бардык өнөктөштөргө балдардын саламаттыгы үчүн көрсөткөн колдоосу жана кызматташтыгы үчүн терең ыраазычылык билдирет. Жүргүзүлгөн иштер Кыргыз Республикасында балдарга көрсөтүлүүчү адистештирилген медициналык жардамдын мүмкүнчүлүктөрүн кеңейтүүгө маанилүү салым кошту.

Эскерте кетсек, 2021-жылдан 2026-жылга чейин Кыргыз Республикасында угуусу начар балдарга жалпы 286 кохлеардык имплант орнотулган.