Кыргыз Республикасынын Мамлекеттик тил күнү,Кыргызстандын мамлекеттик тили — кыргыз тили. Кыргыз Республикасынын Мамлекеттик тил күнү өлкөдө жыл сайын 23-сентябрда белгиленет. Бул күн Кыргыз Рес,Кыргыз Республикасынын Мамлекеттик тил күнү,

Кыргызстандын мамлекеттик тили — кыргыз тили. Кыргыз Республикасынын Мамлекеттик тил күнү өлкөдө жыл сайын 23-сентябрда белгиленет. Бул күн Кыргыз Республикасынын Президентинин 2009-жылдын 22-сентябрындагы №358 Жарлыгына ылайык бекитилген жана 1989-жылдын 23-сентябрында Кыргыз ССРинин Жогорку Совети тарабынан «Кыргыз ССРинин мамлекеттик тили жөнүндө» мыйзамдын кабыл алынышына арналган.

Аталган мыйзам менен кыргыз тилине мамлекеттик тил макамы берилип, ошондой эле төмөнкү жоболор белгиленген:

Кыргыз ССРинде республикада жашаган башка улуттардын тилдеринин эркин өнүгүшү камсыз кылынат.

Кыргыз ССРинин ар бир жараны баарлашуу тилин эркин тандоого укуктуу.

Мыйзамдын 16-беренесинде улуттук топтор, анын ичинде өзбектер, тажиктер, немистер, дунгандар, уйгурлар жана башкалар жыш жашаган аймактардагы жергиликтүү мамлекеттик бийлик жана башкаруу органдары мамлекеттик тил менен катар алардын эне тилин колдонууга укуктуу экени каралган. Бул тилдерди билбеген адамдар үчүн тиешелүү котормо камсыз кылынат.

«Кыргыз ССРинин мамлекеттик тили жөнүндө» мыйзамдын кабыл алынышы кыргыз тилинин андан ары өнүгүшүнө чоң салым кошуп, кыргыз элинин улуттук аң-сезиминин жогорулашына жана мамлекеттик тилдин кадыр-баркынын өсүшүнө өбөлгө түзгөн.